Un acusado de agredir sexualmente dúas menores en Vigo foi expulsado pola súa congregación tras un xuízo interno
Un empresario e membro dunha congregación relixiosa de Vigo está sendo xulgado por supostas agresións sexuais a dúas adolescentes de 15 anos en 2024. A Fiscalía solicita para el 20 anos de prisión. Ademais do proceso penal, o home foi sometido a un xuízo interno polo Consello de Anciáns da súa comunidade, que decidiu expulsalo, aínda que sen facer público o motivo.
O acusado nega os feitos e asegura que as menores o chantaxearon, afirmando que manipularon o seu teléfono móbil. No xuízo, celebrado na Audiencia de Pontevedra con sede en Vigo, as dúas vítimas declararon a porta pechada acompañadas dunha psicóloga debido ás secuelas emocionais.
Segundo as investigacións, o home ofrecía ás menores agásallos e diñeiro e levábaas en coche a diferentes puntos da cidade. A acusación sostén que estas atencións non eran actos de xenerosidade, senón unha forma de gañar a súa confianza. A Fiscalía considera que existen indicios sólidos, incluíndo mensaxes e imaxes de cámaras de seguridade, que apuntan a unha relación inapropiada coas dúas adolescentes.
O pai dunha das vítimas explicou que o Consello de Anciáns convocou o acusado no Salón do Reino e que este recoñeceu os feitos ante eles, motivo polo que foi expulsado da congregación.
Profesionais sanitarios e psicolóxicos que trataron ás menores describiron unha situación de vulnerabilidade extrema, reforzada por antecedentes de violencia e dificultades familiares.
O acusado, que só respondeu ás preguntas do seu avogado, mantén a súa inocencia e asegura que “pecou de ser boa persoa” e que as adolescentes “se aproveitaron del”.