Axios afirma que Netanyahu “estaba que ardía” tras unha chamada con Trump sobre a proposta de paz con Irán. ¿Divorcio post visita a China?
O primeiro ministro israelí, Benjamín Netanyahu, mantivo este martes unha conversa telefónica especialmente tensa co presidente dos Estados Unidos, Donald Trump, a propósito dunha nova proposta para poñer fin á guerra con Irán. Segundo revelou Axios, citando tres fontes coñecedoras da chamada, Netanyahu “estaba que ardía” pola irritación que lle provocou o intercambio.
De acordo co medio estadounidense, Israel quere retomar a ofensiva militar, mentres que Washington e varios mediadores rexionais presionan para avanzar nun acordo de paz elaborado por Catar e Paquistán, co apoio de Arabia Saudita, Turquía e Exipto. Trump insiste en que aínda ve posible un pacto, pero tamén asegura estar disposto a reanudar os combates se as negociacións fracasan. “A única pregunta é se imos rematar isto ou se van asinar un documento. Veremos que pasa”, declarou o mandatario.
Dúbidas en Washington
Axios sinala que Trump oscila entre ordenar un ataque masivo ou manter aberta a vía diplomática. Aínda así, o presidente afirmou que Netanyahu “fará o que eu queira que faga”, aínda que matizou que ambos conservan unha relación estreita.
O medio lembra que, malia episodios puntuais de desacordo sobre Irán, Trump e Netanyahu mantiveron unha coordinación constante durante toda a guerra.