Paco Vázquez pídelle ao Dépor que pare “a tradución” do seu nome ao galego: “Sería romper a súa historia”
O exalcalde da Coruña envía unha carta ao club na que defende a denominación actual e advirte dunha posible perda de identidade
O exalcalde da Coruña, Francisco Vázquez, remitiu unha longa carta ao Real Club Deportivo na que solicita formalmente que non se modifique a denominación oficial da entidade cara a unha forma galeguizada.
O escrito, datado en abril de 2026, expón unha defensa detallada do nome histórico do club e advirte das consecuencias que, ao seu xuízo, tería un cambio deste tipo.
Ao comezo da carta, Vázquez deixa clara a súa postura ao sinalar que “a denominación actual do Deportivo constitúe un elemento esencial da súa identidade pública e deportiva”, destacando que non se trata dunha cuestión menor nin meramente formal.
Nese sentido, engade que “o nome co que o club foi coñecido durante décadas forma parte da súa propia historia e do seu recoñecemento internacional”, apelando ao peso simbólico acumulado ao longo dos anos.