FADEMGA Plena inclusión Galicia reforza o seu compromiso coa saúde mental accesible e especializada
Santiago de Compostela, FADEMGA Plena inclusión Galicia continúa avanzando na mellora dos apoios en saúde mental para persoas con discapacidade intelectual ou do desenvolvemento. A pasada semana celebrouse unha nova reunión do grupo de traballo de saúde mental, un espazo estable no que profesionais de diferentes entidades comparten experiencias, analizan situacións complexas e buscan respostas coordinadas ante os retos que presenta a atención en saúde mental neste colectivo.
Durante o encontro, as persoas participantes puideron coñecer tamén a experiencia de varias profesionais que comezaron a aplicar EMDR, unha técnica de desensibilización e reprocesamento por movementos oculares, adaptándoa ás necesidades das persoas con discapacidade intelectual. Esta aproximación, sempre desde o rigor, a prudencia e unha mirada ética, representa un paso máis na incorporación de ferramentas innovadoras ao ámbito da saúde mental.
A saúde mental, un ámbito cheo de barreiras
FADEMGA lembra que moitas persoas con discapacidade intelectual atopan dificultades para acceder a unha atención en saúde mental adecuada, comprensible e centrada na súa vida. A complexidade das situacións, a falta de recursos especializados e a escasa accesibilidade comunicativa fan imprescindible seguir traballando en rede entre entidades, profesionais, familias e sistema sanitario.
20º Seminario de Discapacidade Intelectual e Saúde Mental
Co obxectivo de seguir avanzando, FADEMGA Plena inclusión Galicia anuncia que o 20 de novembro celebrará o 20º Seminario de Discapacidade Intelectual e Saúde Mental, un encontro de referencia no que se abordarán retos, boas prácticas e novas perspectivas para mellorar os apoios que reciben as persoas con discapacidade intelectual neste ámbito.
Compromiso e colaboración
Desde FADEMGA Plena inclusión Galicia agradecen o compromiso de todas as persoas que forman parte do grupo de traballo, destacando a súa implicación e a vontade de construír respostas máis humanas, accesibles e especializadas.
“A saúde mental debe situarse no centro dos dereitos, dos apoios e da vida das persoas. Só así poderemos garantir unha atención digna, comprensible e adaptada ás súas necesidades”, sinalan desde a entidade.