Sinalado publicamente como moroso por deberlle 17 céntimos a Portos de Galicia
O ente público publica no DOG unha lista con 241 reclamacións de tarifas portuarias, incluíndo débedas inferiores a 1 euro, mentres que Facenda perdoa as que non chegan a 3 euros
A Axencia Tributaria e a Consellería de Facenda perdoaron no 2019 as débedas inferiores a tres euros porque saía máis caro exixilas que cobralas. No 2022 decidiron anular os débitos de menos de tres euros “por motivos estritamente económicos”.
Con todo, o pasado 16 de abril de 2026, Portos de Galicia (ente adscrito á Consellería do Mar) publicou no Diario Oficial de Galicia unha lista con 241 reclamacións de tarifas portuarias. Entre elas, unha por 17 céntimos e outra por 92, ademais doutras tres que non chegan a tres euros.
Aínda que non figuran os nomes dos afectados, si os identifica cos seus DNI. Polo tanto, aparecen sinalados publicamente como morosos por esas pequenas cantidades.
Segundo o anuncio, tamén sairán como debedores no Boletín Oficial do Estado, porque a eficacia da notificación a través do DOG queda supeditada á súa divulgación no estatal. Cando iso ocorra, os afectados disporán de 15 días naturais para comparecer na sede de Portos en Santiago. Se non o fan, a reclamación proseguirá por vía executiva, con posibles recargos e mesmo embargos.