Ourense, 13 de maio de 2010.
UPTA Galicia participou un ano máis en PREVISEL, o Salón de Prevención e Seguridade Laboral celebrado os días 12 e 13 de maio en Expourense. Neste marco, ademais de dispor dun stand para información e asesoramento, UPTA explicou aos autónomos as prácticas axeitadas para unha xestión eficiente da prevención de riscos laborais.
UPTA participou nos diferentes eventos enmarcados en Previsel. No acto inaugural, o director xeral de Relacións Laborais da Xunta de Galicia, Odilo Martiñá, anunciou que o departamento que dirixe porá en marcha un Observatorio Galego de Condicións Laborais, un Laboratorio de Hixiene e Saúde Laboral e unha comisión permanente de riscos laborais relacionados coa igualdade de xénero.
Por outra banda, durante a clausura, UPTA recolleu unha placa conmemorativa como entidade colaboradora do Salón Previsel, símbolo do recoñecemento por contribuír a mellorar a seguridade no traballo. Rogelio Martínez, delegado da Xunta en Ourense, presidiu este acto.
Autogxstión da P.R.L.
UPTA organizou no marco de Previsel dúas xornadas sobre obrigacións e dereitos dos traballadores autónomos en prevención de riscos laborais e a autoxestión preventiva en pequenos negocios. Participaron como relatores Juan Carlos Suárez Pena, técnico en P.R.L., e José Manuel Cotón Carreira, avogado especialista en dereito laboral e colaborador habitual da organización. Xunto a eles, participaron Lisardo Domínguez Rodríguez, secretario xeral de UPTA Galicia, e María Jesús González Paradela, responsable do Departamento Xurídico.
Durante as xornadas presentouse a campaña de divulgación sobre seguridade e saúde no traballo autónomo realizada por UPTA Galicia. Nela, entregouse material informativo a 5.000 autónomos galegos sobre as xestións a realizar para a prevención de riscos e realizáronse enquisas sobre as condicións do traballo autónomo.
UPTA Galicia entregou ás persoas asistentes dous manuais sobre prevención. Por unha banda, a guía “Control documental PRL” é unha revisión de toda a documentación sobre a que se apoia a actividade preventiva. O segundo manual é sobre autoxestión de P.R.L. e presenta os conceptos básicos en relación á xestión da prevención de riscos laborais para os autónomos, subliñando a importancia de que esta tarefa se integre en todos os niveis da empresa. Estas guías teñen unha utilidade fundamental ao sintetizar todos os aspectos referentes á prevención e ao guiar os pasos do empresario autónomo para xestionar con recursos propios as actividades de prevención que non son de obrigada externalización.